Joe 3 | CYM | STEP | Bryd hynny, bydda i'n gwneud i Jwda a Jerwsalem lwyddo eto.

b Eseciel 12:5; 22:15; 36:19

i Amos 1:2

jadlais o Salm 46:1

k Obadeia 1:17

l Amos 9:13

m Eseciel 47:1-12

Joel 3

Yr Arglwydd yn barnu y cenhedloedd

1 Bryd hynny, bydda i'n gwneud i Jwda a Jerwsalem lwyddo eto.

2 Yna bydda i'n casglu'r cenhedloedd i gyd
i “Ddyffryn Barn yr Arglwydd” ^{▼▼3:2 Dyffryn Barn yr Arglwydd Hebraeg, “Dyffryn Jehosaffat”, sy'n golygu “Y Dyffryn ble mae'r Arglwydd yn barnu”.}
Yno bydda i'n eu barnu nhw
am y ffordd maen nhw wedi trin
fy mhobl arbennig i, Israel.
Am eu gyrru nhw ar chwâl i bobman, ^b
rhannu y tir rois i iddyn nhw
3 a gamblo i weld pwy fyddai'n eu cael nhw'n gaethion.
Gwerthu bachgen bach am wasanaeth putain,
a merch fach am win i'w yfed.

4 Pam wnaethoch chi'r pethau yma Tyrus a Sidon ^{▼▼3:4 Tyrus a Sidon Dwy dref ar arfordir Phoenicia.} ac ardal Philistia? Oeddech chi'n ceisio talu'n ôl i mi? Byddwch chi'n talu yn fuan iawn am beth wnaethoch chi! 5 Dwyn fy arian a'm aur, a rhoi'r trysorau gwerthfawr oedd gen i yn eich temlau paganaidd chi. 6 Gwerthu pobl Jwda a Jerwsalem i'r Groegiaid, er mwyn eu symud nhw yn bell o'u gwlad eu hunain. 7 Wel, dw i'n mynd i ddod â nhw'n ôl. A bydda i'n gwneud i chi dalu am beth wnaethoch chi! 8 Bydda i'n rhoi eich meibion a'ch merched chi i bobl Jwda eu gwerthu nhw. Byddan nhw'n eu gwerthu nhw i'r Sabeaid ^{▼▼3:8 Sabeaid Pobl Seba, ardal yn ne-orllewin Arabia.} sy'n byw yn bell i ffwrdd. Dw i, yr Arglwydd, wedi dweud!

Dyffryn Barn yr Arglwydd

9 Cyhoedda wrth y cenhedloedd:

Paratowch eich hunain i fynd i ryfel.
Galwch eich milwyr gorau!
Dewch yn eich blaen i ymosod!
10 Curwch eich sychau aradr yn gleddyfau,
a'ch crymanau tocio yn waywffyn. ^{▼▼3:10 Curwch … waywffyn Yn wahanol i Eseia 2:4 a Micha 4:3, yma mae offer ffermio yn cael eu troi yn arfau rhyfel. Mae Eseia a Micha yn cyfeirio at yr heddwch sydd i ddod, ond mae Joel yn sôn am gyfnod o farn.}
Bydd rhaid i'r ofnus ddweud, “Dw i'n filwr dewr!”
11 Brysiwch! Dewch, chi'r gwledydd paganaidd i gyd.
Dewch at eich gilydd yno!
(“Arglwydd, anfon dy filwyr di i lawr yno!”) ^{▼▼3:11 Arglwydd … yno! Mae'r weddi yma (gan y proffwyd?) yn torri ar draws yr alwad i'r cenhedloedd paganaidd. Mae'n weddi ar Dduw i anfon ei fyddin nefol i ddelio gyda nhw.}
12 Dewch yn eich blaen, chi'r cenhedloedd,
i Ddyffryn Barn yr Arglwydd. ^{▼▼3:12 Dyffryn Barn yr Arglwydd gw. nodyn ar 3:2.}
Yno bydda i'n eistedd i lawr
i farnu'r cenhedloedd i gyd.
13 Mae'r cynhaeaf yn barod
i'w fedi gyda'r cryman!
Mae'r gwinwasg yn llawn grawnwin
sy'n barod i'w sathru! ^{▼▼3:13 sathru Roedd pobl yn sathru grawnwin gyda'i traed, i wasgu'r sudd allan.}
Bydd y cafnau yn gorlifo!
Maen nhw wedi gwneud cymaint o ddrwg.
14 Mae tyrfaoedd enfawr yn Nyffryn y dyfarniad!
Mae dydd barn yr Arglwydd yn agos yn Nyffryn y dyfarniad!
15 Mae'r haul a'r lleuad wedi tywyllu,
a'r sêr wedi diflannu.
16 Mae'r Arglwydd yn rhuo o Seion;
a'i lais yn taranu o Jerwsalem, ⁱ
nes bod yr awyr a'r ddaear yn crynu.
Ond mae'r Arglwydd yn lle saff i'w bobl guddio ynddo,
mae e'n gaer ddiogel i bobl Israel. ^j
17 Byddwch chi'n deall mai fi ydy'r Arglwydd eich Duw
a'm bod i'n byw ar Seion, fy mynydd cysegredig.
Bydd dinas Jerwsalem yn lle cysegredig, ^k
a fydd byddinoedd estron ddim yn mynd yno byth eto.

Adfer Jwda a Jerwsalem

18 Bryd hynny bydd gwin melys yn diferu o'r mynyddoedd, ^l
a llaeth yn llifo o'r bryniau;
fydd nentydd Jwda byth yn sychu.
Bydd ffynnon yn tarddu a dŵr yn llifo
allan o deml yr Arglwydd, ^m
i ddyfrio Dyffryn y Coed Acasia. ^{▼▼3:18 Dyffryn y Coed Acasia Hebraeg, “Dyffryn Sittim”. Mae coed Acasia yn gallu tyfu ar dir sych iawn. Falle ei fod yn cyfeirio at wadi sych iawn rywle yn ardal Jerwsalem.}
19 Am iddyn nhw fod mor greulon at bobl Jwda,
a lladd pobl ddiniwed yno,
bydd yr Aifft yn dir diffaith gwag
ac Edom yn anialwch llwm.
20 Ond bydd pobl Jwda yn saff bob amser,
ac yn byw yn Jerwsalem o un genhedlaeth i'r llall.
21 Wna i ddial ar y rhai wnaeth dywallt eu gwaed nhw?
Gwnaf! Bydda i'n eu cosbi nhw.

Bydda i, yr Arglwydd, yn byw yn Seion am byth!